මූලික වශයෙන් ලිංගිකව සම්ප්‍රේෂණය වන ආසාදන කාණ්ඩ 4කට බෙදේ.

* බැක්ටීරියා - සිපිලිස් (උපදංශය) , ක්ලැමීඩියා, ගොනෝරියා

* වෛරස් - හර්පීස්, ලිංගික ඉන්නන්, එච්අයිවී

* දිලීර - කැන්ඩිඩයිසීස්

* පරපෝෂිත - ස්කේබීස් , ට්‍රයිකොමනාසිස්

මේ ආසාදන වල මුල් අවදියේදී ඇති විය හැක් පොදු රෝග ලක්ෂණ කිහිපයක් පහතින් දැක්වෙනවා.

පුරුෂයන්ට

මුත්‍රා පිට කිරීමේදී හෝ ශුක්‍ර මෝචනයේදී වේදනාවක් හෝ දැවිල්ලක් ඇති වීම

ශිෂණයෙන් සැරව හෝ වතුර වැනි හෝ කිරි පැහැති ද්‍රාවණයක් පිට වීම

* වෘෂණ කෝෂ ඉදිරිමීම සහ/හෝ තද ගතියක් දැනීම
* ගුදය වටා ඉදිමීම
* සාමාන්‍ය ප්‍රමාණයට වඩා මුත්‍රා පිට කිරීම
* ලිංගික අවයව කැසීම
* ලිංගික අවයව සහ ගුදය අවට ඉන්නන් ඇති වීම
* හේතුවක් නැතිව දිගටම පවතින උණ

ස්ත්‍රීන්ට

* උදර වේදනාව
* අසාමාන්‍ය ලෙස යෝනි මාර්ගයෙන් ශ්‍රාව පිට වීම
* ඔසප් වීමට අමතර රුධිරය පිටවීම
* ලිංගික සංසර්ගයේදී වේදනාවක් ඇති වීම
* මුත්‍රා කිරීමේදී වේදනාවක් හෝ දැවිල්ලක් ඇති වීම
* ලිංගික අවයව සහ ගුදය අවට ඉන්නන් ඇති වීම
* යෝනි මාර්ගයේ හෝ ගුදය අවට ඉදිමීම
* සාමාන්‍ය ප්‍රමාණයට වඩා මුත්‍රා පිට කිරීම
* ලිංගික සංසර්ගයෙන් පසු යෝනි මාර්ගයෙන් රුධිරය පිට වීම
* ගැබ් ගෙලෙන් දුගද හමන ශ්‍රාවයක් පිට වීම
* ලිංගික අවයව කැසීම
* ලිංගික අවයව වල සහ ඒ වටා බිබිලි ඇති වීම
* යෝනි ප්‍රදේශය ඉදිමීම හෝ තද ගතියක් දැනීම
* හේතුවක් නැතිව දිගටම පවතින උණ

මෙම ආසාදනවලට පොදු රෝග ලක්ෂණ තිබෙන බව ඔබට පෙනෙනවා ඇති. ලිංගිකව සම්ප්‍රේෂණය වන ආසාදනයක් බෝවී රෝග ලක්ෂණ මතු වීමට යම්කිසි කාලයක් ගතවිය හැකියි. බොහෝ විට කිසිම රෝග ලක්ෂණයක් පෙන්නුම් කරන්නේ නැහැ. ඒ නිසා කොන්ඩම් භාවිතා නොකර සිදුකරන ලිංගික ඇසුරකින් පසුව පරීක්ෂණයක් සදහා යොමු වී වැදගත්. මුල් කාලයේදීම හදුනාගතහොත් මේවාට පහසුවෙන් ප්‍රතිකාර ලබා ගෙන සාමාන්‍ය පරිදි ජීවත් වීමට ඕනෑම පුද්ගලයෙකුට අවස්ථා තිබෙනවා.

ජාතික ලිංගාශ්‍රිත රෝග සහ එච්අයිවී මර්දන ව්‍යාපෘතිය (https://www.aidscontrol.gov.lk/index.php?lang=en ) මගින් ප්‍රකාශයට පත් කර ඇති දත්ත අනුව 2023 වසර තුළ වාර්ථා වී ඇති ලිංගිකව සම්ප්‍රේෂණය වන ආසාදන සංඛ්‍යා පහතින් දැක්වෙනවා.

එච්අයිවී - 605

මුල් කාලීන සිෆිලිස් - 219

ප්‍රමාද වී හදුනා ගත් සිෆිලිස් - 551

සංජානනීය සිෆිලිස් - 07

ගොනෝරියාව - 756

ක්ලැමීඩියාව - 11

ලිංගික හර්පීස් - 2343

ලිංගික ඉන්නන් - 2134

ට්‍රයිකොමනාසිස් - 57

කැන්ඩිඩයසිස් - 2417

බැක්ටීරියානු වැජිනෝසිස් - 996

ස්කේබීස් සහ හෙපටයිටීස් බී ඇතුළු වෙනත් ලිංගිකව සම්ප්‍රේෂණය වන ආසාදන - 326

*මේ දත්ත වල ඇතුළත් වන්නේ රජයේ සායන වලට වාර්තා වූ සිදුවීම් පමණි.

අනාරක්ෂිත ලිංගික ඇසුරක් පවත්වා ඇත්නම් අපට කළ හැකි ප්‍රධානම දෙය වන්නේ පරීක්ෂණයක් සදහා යොමු වීමයි. රජයේ රෝහල් වලින් මෙම පරීක්ෂන නොමිලේ ලබා ගැනීමට පුළුවන්. එසේම පෞද්ගලික අංශයෙන්ද ඔබ කැමතිනම් පරීක්ෂණ සිදු කල හැකියි. පරීක්ෂණ පිිළිබද වැඩිදුර විස්තර රජයේ ලිංගාශ්‍රිත රෝග මර්ධන වැඩසටහන මගින් පවත්වා ගෙන යන වෙබ් අඩවියෙන් ලබා ගැනීමට පුළුවන්.
https://www.aidscontrol.gov.lk/index.php?lang=en

පරීක්ෂණ සදහා දුරකතනයෙන්ම වේලාවක් වෙන් කරවා ගැනීමට https://know4sure.lk/ ඇප් එකෙන් හෝ වෙබ් අඩවියෙන් පුළුවන්.

ලිංගික ව සම්ප්‍රේෂණය වන ආසාදන වළක්වා ගැනීමට සිටීමට තරුණ ප්‍රජාවට කළ හැකි දේ පහතින් දැක්වෙනවා.
* ඔබේ සහකරු පැරණි සහකරුවන් සහකාරියන් සමග අනාරක්ෂිතව ලිංගිකව හැසිරී ඇත්දැයි සාකච්ඡා කරන්න.
* විවාහයෙන් පසු ලිංගික සම්බන්ධතා පැවැත්වීම තම විවාහක සහකරුට හෝ සහකාරියට පමණක් සීමා කරන්න.
* තාවකාලික සහකරුවන් / සහකාරියන් සමග අනාරක්ෂිතව ලිංගික හැසිරීම්වලින් වළකින්න.එසේ ලිංගිකව හැසිරෙන සෑම විටම නිවැරදිව කොන්ඩමයක් භාවිත කරන්න.
* ඔබ තාවකාලික සහකරුවන් / සහකාරියන් සමග කොන්ඩොමයක් නොමැතිව අනාරක්ෂිත ලිංගික හැසිරීමක යෙදුනානම් වහාම වෛද්‍යවරයෙකු හමු වන්න.
* ලිංගිකව සම්ප්‍රේෂණය වන ආසාදනයක් ඇත්නම් ප්‍රතිකාර ලබා ගන්න.

පහතින් දැක්වෙන්නේ ඒ ඒ ආසාදනය පිළිබද කෙටි විස්තරයක්.

බැක්ටීරියා නිසා ඇති වන ආසාදන වල රෝග ලක්ෂණ කිහිපයක් පහතින් දැක්වේ.


ගොනෝරියාව

* පිරිමින්ගේ මූත්‍ර මාර්ගයෙන් සැරව හෝ සුදු දියරමය ශ්‍රාවයක් පිට වීම සහ මූත්‍ර කරන විට දැවිල්ලක් හා වේදනාවක් ඇති වීම

* ස්ත්‍රීන්ගේ කලාතුරකින් අවස්ථාවක යෝනි මාර්ගයේ සැරව හෝ දියරමය ශ්‍රාවයන් පිට වීම

* බොහෝ විට මුල් අවධියේ ස්ත්‍රීන්ගේ රෝග ලක්‍ෂණ නොපෙන්වයි.



සිෆිලිස් (උපදංශය )

* ලිංගේන්ද්‍රිය තුළ හෝ ඒ අවට වේදනාවක් නැති තුවාලයක් ඇති වීම
ඉකිලිවල වසා ග්‍රන්ථි ඉදිමීම



ක්ලැමීඩියා

* ස්ත්‍රීන්ගේ යෝනි මාර්ගයෙන් ද, පිරිමින්ගේ ශිෂ්නයෙන් ද ස්‍රාවයක් පිට වේ.
මූත්‍ර පිට කිරීමේ දී දැවිල්ල හා වේදනාව ඇති වේ.

* ගර්භාෂ ගෙල ආසාදනය වේ.
පුරුෂයින්ගේ ලිංගාශ්‍රිත ප්‍රදේශය ඉදිමේ.



මෙම ආසාදනවලට පොදු රෝග ලක්ෂණ තිබෙන බව ඔබට පෙනෙනවා ඇති. ලිංගිකව සම්ප්‍රේෂණය වන ආසාදනයක් බෝවී රෝග ලක්ෂණ මතු වීමට යම්කිසි කාලයක් ගතවිය හැකියි. බොහෝ විට කිසිම රෝග ලක්ෂණයක් පෙන්නුම් කරන්නේ නැහැ. ඒ නිසා අනාරක්ෂිත ලිංගික ඇසුරකින් පසුව පරීක්ෂණයක් සදහා යොමු වී වැදගත්. මුල් කාලයේදීම හදුනාගතහොත් මේවාට පහසුවෙන් ප්‍රතිකාර ලබා ගෙන සුව වීමට ඕනෑම පුද්ගලයෙකුට අවස්ථා තිබෙනවා.

වෛරස් මගින් ඇති වන ආසාදන සම්පූර්ණයෙන් සුව කිරීමට ප්‍රතිකාර නැහැ. නමුත් මුලදී හදුනාගත් විට ආසානය පාලනය කර ගෙන සාමාන්‍ය පරිදි ජීවත් විය හැකිය. වෛරස් ආසාදන පිළිබඳ කෙටි විස්තරයක් පහතින් දැක්වෙනවා.



ලිංගික ඉන්නන් (HPV)

* ලිංගික ඉන්නන් බෝ වන වෛරසය හදුන්වන්නේ මානව පැපිලෝමා වෛරසය නමින්.

* මානව පැපිලෝමා වෛරසයේ ප්‍රභේද 200ක් පමණ තිබෙනවා. එයින් 40ක් පමණ ලිංගාශ්‍රිතව ආසාදනය වීමට පුළුවන්. එනම්, යෝනි ප්‍රදේශය, යෝනි මාර්ගය, ගැබ්ගෙල, ගුද මාර්ගය සහ ඒ අවට, ශිෂ්ණය සහ වෘෂණ කෝෂ මෙන්ම මුඛය අවටත් මෛ ආසාදනය ඇති විය හැකියි. මේ වෛරස ප්‍රභේද ඇති වන්නේ ලිංගික ස්පර්ශය එම් ලිංගික ප්‍රදේශය සමට සම ගැටීමෙනුයි.
අනෙකුත් ප්‍රභේද වලින් කකුලේ හෝ ඇගිලි වල ඇති වන ඉන්නන් මතු වනවා. ඒවා ලිංගාශ්‍රිතව ආසාදනය වන්නේ නැහැ.

* ලිංගිකව හැසිරෙන බෙහෝ දෙනාට මානව පැපිලෝමා වෛරසය ආදානය වන අතර, ඇතැම් අයට කිසිම රෝග ලක්ෂණයක් මතු වන්නේ නැහැ. නමුත් මානව පැපිලෝමා වෛරසයේ ප්‍රභේද කිහිපයක් මගින් ලිංගික ඉන්නන් සහ පිළිකා ඇති වීමට හේතු වනවා.

* උදාහරණ ලෙස වෛරසයේ 6 සහ 11 යන ප්‍රභේද මගින් ලිංගික ඉන්නන් ඇති වනවා. වෛරසයේ 16 සහ 18 යන ප්‍රභේද වලින් පිළිකා සහ වඩාත් බරපතල සෞඛ්‍යය තත්වයන් ඇති විය හැකියි.
මානව පැපිලෝමා වෛරසය සුව කළ හැකි ප්‍රතිකාරයක් නොමැත.

* පිළිකා සදහා බලපාන වෛරස ප්‍රභේද ආසාදනය වීම වැළැක්වීම සදහා එන්නත් වර්ග තිබෙනවා. ශ්‍රී ලංකාවේද 6 ශ්‍රේණියේ සිට සියළුම ගැහැණු දරුවන්ට ජාතික එන්නත් කරන ව්‍යාපෘතිය හරහා මෙම එන්නත් ලබා දෙනවා.

* මානව පැපිලෝමා වෛරසය කලින් හදුනා ගැනීමෙන් බරපතල සෞඛ්‍යය මගහරවා ගැනීමට පුළුවන්. ඒ නිසා ලිංගිකව ක්‍රියාකාරී කාන්තාවන්ට පැප් පරීක්ෂණය සදහා යොමු වීම වැදගත්.



හර්පීස්

* හර්පීස් ආසාදනය ඇති වන්නේ එකිනෙකට වෙනස් නමුත් සාමානකම් ඇති වෛරස ප්‍රභේද දෙකක් මගිනි. එනම් හර්පීස් සිම්ප්ලෙස්ක් ප්‍රභේද 1 සහ හර්පීස් සිම්ප්ලෙස්ක් ප්‍රභේද 2 යන ප්‍රභේදයි. මේ ප්‍රභේද දෙක මගින්ම යෝනි ප්‍රදේශය, යෝනි මාර්ගය, ගැබ්ගෙල, ගුද මාර්ගය සහ ඒ අවට, ශිෂ්ණය සහ වෘෂණ කෝෂ, කළවා, උගුර, මුඛය, තොල් මෙන්ම ඇස් වලත් තුවාල ඇති වනවා.

* හර්පීස් ආසානය සම්ප්‍රේෂණය වන්නේ ආසාදන ඇති පුද්ගලයකු සමග සමට සම ස්පර්ශ වීමෙනුයි. හර්පීස් නිසා ඇති වන තුවාල ඇතැම් විට කැසීමකදී ඇති වූවක් ලෙස වැරදියට සිතා නොසලකා හැරීමට ලක් වනවා. ඒ වගේම කිසිම රෝග ලක්ෂණයක් නොමැති අයගෙන්ද හර්පීස් ආසාදනය සම්ප්‍රේෂණය වන්නට පුළුවන්. හර්පීස් ආසාදනය සම්ප්‍රේෂණය වීමට ලිංගික ඇසුරක්ම අවශ්‍ය වන්නේ නැහැ. වෛරසය ක්‍රියාකාරීව පවතින කෙනෙකුගේ, ලිංගික ප්දේශයේ හෝ මුඛයේ වෛරසය නිසා ඇතිවූ බිබිලි සහ තුවාල ස්පර්ශයෙන් ද වෛරසය බෝ වීමට පුළුවන්. රෝග ලක්ෂණ මතුවීමට පෙරත් හරිපීස් වෛරසය බෝ වීමට පුළුවන්.

* හර්පීස් ආසාදනය සම්පූර්ණයෙන් සුව කළ නොහැකි අතර ප්‍රතිකාර ලබා ගැනීමෙන් රෝග ලක්ෂණ සුව කර ගත හැකියි. එමෙන්ම තවත් කෙනෙකුට බෝ වීමට ප්‍රතිකාර ගැනීමෙන් අවම කර ගන්න පුළුවන්.



එච්අයිවී

* එච්අයිවී වෛරසට සිංහලෙන් හදුන්වන්නේ මානව ප්‍රතිශක්තිකරණ ඌණත් වෛරසය ලෙසයි.

* මෙම වෛරසය පහර දෙන්නේ අපේ ප්‍රතිශක්තිකරණ පද්ධතිය සකස් වී ඇති සුදු රුධිරාණු: ප්‍රධාන වශයෙන්ම එහි ඇති සීඩී 4 සෛල වලටයි. සීඩී 4 සෛල යනු ස්වාභාවිකව ආසාදන සමග සටන් කිරීමෙහිලා විශාල කාර්යක් ඉටු කරන සුදු රුධිරාණු වර්ගයක්. මෙම වෛරසය ආසාදනය වී ප්‍රතිකාර නොකර හැරියහොත් වෛරසය විසින් ප්‍රතිශක්තිකරණ පද්ධතියේ
සෛල (CD4 සෛල) විනාශ කරමින් එච්.අයි.වී සමග ජීවත් වන පුද්ගලයාව අවස්ථාවාදී ආසාදන සදහා නැඹුරු කරවනවා. ප්‍රතිකාර නොගතහොත්
අවස්ථාවාදී ආසාදන කිහිපයක් එක විට ඇති වී ඒඩ්ස් (නතුකරගත් ප්‍රතිශක්ති ඌණතා සහලක්ෂණය) තත්ත්වය ඇති වීමට පුළුවන්.

* එච්.අයි.වී සමග ජීවත් වන පුද්ගලයෙකුගේ රුධිරය, ශුක්‍ර තරල, යෝනි ශ්‍රාව, මව් කිරි යන තරල වලින් එකක් තවත් පුද්ගලයෙකුගේ රුධිර සංසරණ පද්ධතියට ඇතුළු වීම මගින් එච්.අයි. වී ආසාදනය වනවා. එසේ වීමට සමෙහි කැපුමක්, තුවාලයක් හෝ කිසියම් ආකාරයේ රුධිර සංසරණ පද්ධතියට විවෘත වීමක් තිබිය යුතුයි.

* ගුද සංසර්ගය, යෝනි සංසර්ගය, මුඛ සංසර්ගය සහ යන ආකාර තුනෙන්ම HIV බෝ විය හැකිය. මෙහිදී වැඩිම අවදානම ඇත්තේ ගුද මාර්ගික සංසර්ගයයි.
යෝනි මාර්ගයේ, ගුද මාර්ගයේ සහ මුඛය තුළ ඇති සිළුටු ශේෂමල පටල නිතර මෙවැනි කැපුම් සීරීම් වලට ලක් වන නිසා අනාරක්ෂිත ලිංගික හැසිරීම් මගින් එච්.අයි.වී සම්පේෂණය වීම සිදු වෙනවා.

* එච්අයිවී සම්පූර්ණයෙන් සුව කිරීමට තවමක් ඖෂධයක් සොයා ගෙන නැහැ. නමුත් වෛරසය පාලනය කිරීම සදහා ප්‍රතිකාර යොදා ගන්නවා. එච්අයිවී සදහා ලබා දෙන ඒආර්ටී නැමති ප්‍රතිකාර මගින් වෛරසයේ ව්‍යාප්තිය පාලනය කරන අතර වෛරස් ප්‍රමාණය හදුනාගත නොහැකි තත්ත්වයකට පත් කරනවා. ඒ නිසා ක්‍රමවත් ලෙස ප්‍රතිකාර ගන්නා පුද්ගලයෙකුගෙන් එච්අයිවී සම්ප්‍රේෂණය වන්නේ නැහැ.

* මවගෙන් දරුවාට එච්අයිවී සම්ප්‍රේෂණය වීම 2018 සිට ශ්‍රී ලංකාව සම්පූර්ණයෙන්ම වලක්වා තිබෙනවා. එසේ කිරීමට හැකියාව ලැබී ඇත්තේ සියලුම ගර්භනී මව් වරු ඉක්මනින්ම HIV සඳහා පරීක්ෂා කිරීම මගින් ආසාදිත අය හඳුනා ගැනීමෙන් සහ ඔවුන්හට ඉක්මනින්ම ප්‍රතිකාර කිරීම නිසයි.

ඔබට ලිංගිකව සම්ප්‍රේෂණය වන ආසාදනයක් ඇති දැයි දැන ගැනීමට ඇති හොදම ක්‍රමය වන්නේ පරීෂණයක් සදහා යොමු වීමයි. වෛරස් ආසාදන සම්පූර්ණයෙන් සුව කළ නොහැකි වුවත් දිලීර සහ පරපෝෂිත ආශ්‍රයෙන් හට ගන්නා ආසාදන සම්පූර්ණයෙන් සුව කිරීමට පුළුවන්. වැදගත්ම දෙය වන්නේ මුල් කාලයේදීම ආසාදනය ශරීර ගත වී ඇත්දැයි දැන ගැනීමයි.



කැන්ඩිඩයසිස්

* කැන්ඩිඩයසීස් ආසාදනය ඇති වන්නේ කැන්ඩිඩා නැමති දිලීරය මගින්. කැන්ඩිඩා දිලීරයේ ඇතැම් ප්‍රභේද මගින් මානවන් අතර ආසානද ඇති කරනවා. බහුලව ඇති ප්‍රභේදය වන්නේ කැන්ඩිඩා ඇල්බිකෑන්ස් නැමති දිලීර ප්‍රබේදය මගින්. සාමාන්‍යයෙන් මෙම දිලීරය සම මත හෝ ශරීරය අභ්‍යන්තරයේ එනම් මුඛය, යෝනි මාර්ගය, බඩවැල් සහ උගුරේ පවතින අතර කැන්ඩිඩා ආසානය ඇති වන්නේ මෙම දිලීරය පාලනයකින් තොරව වර්ධනය වීම මගින්. උදාහරණයක් ලෙස දිලීරය රුධිර සංසර්ණ පද්ධතියට හෝ මොලය, හෘදය සහ වකුගඩු වැනි ශරීරයේ අභ්‍යන්තර අවයව ආසාදනය කිරීමේ හැකියාව මෙම දිලීරය සතුයි.
ක්‍රමවත් ප්‍රතිකාර ලබා ගැනීමෙන් කැනිඩිඩයසීස් ආසාදනය සුව කර ගැනීමට පුළුවන්.

* මෙය රෝහය ලිංගික ඇසුරකින් තොරව වුවද වැළදිය හැකිය.



ස්කේබීස්

* ඉතා කුඩා පරපෝෂියකු මගින් සමේ කැසීමක් ඇති කරන ස්කේබීස් ආසාදනය ඇති වනවා. අනාරක්ෂිත ලිංගික ඇසුර සහ සමට සම ස්පර්ශ වීමෙන් ස්කේබීස් ආසාදනය සම්ප්‍රේෂණය විය හැකියි.

* අපේ ශරීරයේ සම ඇතුළත ස්ථරයේ ස්කේබීස් පරපෝෂියන් බිත්තර දමා පරපෝෂිතයන්ගේ ප්‍රමාණය වැඩ කර ගන්නවා. ස්කේබීස් පරපෝෂිතයන් අපේ සමේ ජීවත් වන විට කැසීම, දද සහ කුෂ්ඪ ඇති වනවා.

* බෙහෝ වැඩිහිටියන්ට ස්කේබීස් ආසාදනය වන්නේ ලිංගික ඇසුරෙන් වුවත් ආසාදනය ඇති පුද්ගලයන්ගේ තුවා, නොසේදූ ඇදුම්, ඇද ඇතිරිලි හවුලේ භාවිත කිරීමෙන්ද ස්කේබීස් පරපෝෂිතයන් අපේ ශරීරයට සම්ප්‍රේෂණය විය හැකියි. නමුත් අතට අත දීමෙන්, සුබ පැතීමකදී වැළද ගැනීමෙන් ස්කේබීස් සම්ප්‍රේෂණය වීම ඉතාම දුර්ලභයි.

* ස්කේබීස් සදහා ඇති ප්‍රතිකාර බෙහෝ විට ක්‍රීම් හෝ ලෝෂන් ස්වරූපයක් ගන්නා අතර ඇතැම් අවස්ථා වලදී ඖෂධ පෙතිද වෛදරවරුන් නිර්දේශ කරනවා. ප්‍රතිකාර ලබා ගැනීමට අමතරව, පෞද්ගලික පවිත්‍රතාවය ඉහල දමා ගැනීම ස්කේබීස් ආසාදනය සුව කර ගැනීමට වැදලත් වනවා. ඇද ඇතිරිලි සෝදා ඉර අවුවේ වේලා ගැනීම, පාපිසි වැනි පරපෝෂිතයන්ට ජීවත් විය හැකි ස්ථාන පවිත්‍ර කිරීම ආදිය එය වැළැක්වීමට සහය වනවා.

* මෙය රෝහය ලිංගික ඇසුරකින් තොරව වුවද වැළදිය හැකිය.



ට්‍රයිකොමනාසිස්

* ට්‍රයිකොමනාසිස් නැමති ආසාදන ඇති වන්නේ ට්‍රයිකොමනා නැමති ඉතා බහුලව ඇති පරපෝෂිතයෙකු මගින්. ලිංගික ඇසුරකදී ලිංගික තරල එනම්, යෝනි ශ්‍රාවය, ශුක්‍ර තරලය මගින් මෙම පරපෝෂිතයන් සම්ප්‍රේෂණය වනවා.

* සාමාන්‍ය ඇසුරේදී එනම්, වැළද ගැනීමේදී, සිප ගැනීමේදී හෝ අතට අත දීමේදී මෙම ආසාදනය සම්ප්‍රේෂණය වන්නේ නැහැ.

* ට්‍රයිකොමනාසිස් ප්‍රතිකාර ලබා දීම මගින් සුව කළ හැකි ආසාදනයක්.

* මෙම ආසාදනය ඇති බෙහෝ අයට කිසිදු රෝග ලක්ෂණයක් මතු වන්නේ නැහැ. නමුත් ඒ අයගේ ආසාදනය සම්ප්‍රේෂණය විය හැකියි. ආරක්ෂිත ලිංගික ඇසරක් පවත්වනවා නම් ට්‍රයිකොමනාසිස් ආසාදනය වීම සම්පර්ණයෙන්ම වළක්වා ගැනීමට පුළුවන්.